RCU: Project Day

 

صباحكم / مساءكم حُب ..

 أخبار اللي واحشيني فديتهم .. ؟

صار لي فترة عن التقارير .. واليوم معي تقرير عن البروجكت دي في جامعتنا ..

طبعا اللي دروا دروا واللي ما دروا يدرون أنهم غيروا اسمها من كلية الجبيل الجامعية إلى جامعة الهيئة الملكية ، بالإضافة إلى أنهم اعترفوا فيها دوليا الأسبوع اللي راح ..

غير كذا .. الأسبوع الجاي إجازة بمناسبة زيارة أنكل جورج بوش للمنطقة الشرقية .. فيه ناس كذبوا الخبر يقولون ما فيه إجازة .. الله أعلم .. بس في الجريدة يقولون السبت راح يتأكد 

 

المهم من ثلاث أسابيع واحنا نجهز ونعد العدة للبروجكت دي و نقص ونحوس و هات يا قماش و إضاءة و أسلاك .. بروجكتنا كان غاليري ..

أنوااااع الوناسة لأن تخصصنا غير .. الأم آي إس و السي إس و البزنس كلهم تقريبا نفس الكارير في النهاية .. الأم آي إس 1 سووا كوفي شوب و الأم آي إس 2 سووا سكيري هاوس – اسمحوا لي أنا سميته تكفيخ هاوس !! لأنهم يضربون مو يخوفون !  - و البزنس و السي إي كلهم عارضين لابتوبات و سيديات و اكسسوارات .. إلا أحنا فديتنا .. غاليري .. كانت أجواء الإفتتاح غير على أنغام فيروز ,, ما أستعجل .. خلونا نشوف مراحل العمل ..

 

قص البراويز ..  

 

لازم بريك .. لازم دومينوز

بس يا أننا سوينا مقلب غير مقصود في مسنا الهندية ..

هي هندوسية و حرام عندهم ياكلون لحم .. وطبعا البيتزا لازم فيها لحم .. قمنا حطينا لها قطعتين وحده لحم والثانية باباروني ..عاد هي رجعت اللحم قالت ما آكله وأخذت الباباروني تحسبه طماط .. يوم أكلته جتنا تسأل قالت وشو هذا ؟

قلنا باباروني .. قالت يعني من وشو ؟

قلنا لحم ..

عاد لو تشوفون وجهها وشلون انصفق ..

لووووووووووول البنات أنواااع التعليقات ..

ياااويلك يا مس أكلتي إلهك .. ههههههههههه وقعدت تنقش في البيتزا وشالت كل شي عليها و أكلتها كذا .. !!

 

 

هذي قرطاسيتنا .. كل مايحتاجه الديزاينر وفرته لنا الهيئة الملكية الله يعزها .. وهي سر حسد الأقسام الثانية لنا   

 

مكتبي وحوستي ..

  

 

 

 

الخطوة الثانية .. يرتبون لنا الكافيريا .. ويقلعون كل الكراسي والطاولات بعيد ويحطون لنا البارتشنز ..

  

ونبدأ نثبت القماش على البارتشنز .. جلسنا إلى الساعة 8 ونص واحنا نقص و ندبس  .. وصلنا لمرحلة تحشيش مستعصية .. وصار الاستيعاب بطيء !!

 

بعد تركيب الاضاءة السبوت لايت و تثبيت الأعمال .. طبعا كل بنت مع مجموعة من شغلها ..

 

و هذي فازات حطينا فيها شموع وصارت حركة حلوة .. .. طبعا هذا كورنري و كورنر غدّو

فديتها مس قريشيا ..

 

 

بالمره مريت من عند مستودع الفتنس ولقيته مفتوح و أخذت له هالصورة .. 

 

آآآآآآآآآآآآآآآآ باسكن روبنز كااان هناااا .. 

هذا الكوفي شوب حق الأم آي إس 1 .. خطييييييييير ..

 

وهذا تخريع هاوس – يقولون أن كلية التربية سوت زيه قبل !! ..

 

الكومبيوتر ساينس .. مافهمت الحوسة هذي بالضبط لأيش .. أظنهم كانوا يعرضون شيء عن الجافا وكذا ..

البزنس ما أدري وشو مشروعهم بالضبط بس عجبتني حركة الشاشة اللي يتكلم فيها بيل غيتس … 

صابون صناعة مختبر الكمستري ..

قصته قصة ..

من أول سمستر درست فيه كمستري و أخذنا الصابون .. جبت معي زيت عطر وأعطيته لمس ندى فديتها قلت نبي نحطه مع الصابون عشان تصير ريحته حلوه ..

بس قدنا سوينا التجربة وخلاص .. قالت بعدين ..

والسمستر اللي بعده خلصت وصار عندي كمستري 2 .. شافتني في الممر قالت تراني باقي متذكرة أني وعدتك بصابون بزيت العطر اللي تحبينه

قلت لها أصلا نسيت الموضوع ,,

والسمستر الثالث .. في البروجكت دي .. مرتني في الغاليري قالت فوفو تعالي بوريك شي .. وورتني صابون مسويته بالعطر اللي جبته ..

لميتها و شكرتها انها باقي متذكرة و شلت الصابون معي

 

الفتنس سووا عيادة يقيسون وزن وطول وضغط ومدري وشو..  

 

 

هذا ما أدري تبع مين بالضبط .. ماشاء الله كلهم جايبين مكاتب و مرتزين عليها ..  

 

برضوا السي إس ..مدري البزنس.. والله لاتلوموني .. كلهم يتشابهون ..

و أنتهى اليوم و شلنا قشنا ..

كان تعب مرررررره

أهني كل الديزاينر اللي كانت نتيجة شغلنا باينه في ردود أفعال كل من يدخل الغاليري ..

 وأولهم مس نورة ودكتور نضال لما قصوا شريط الافتتاح ..

كل بنت وقفت عند شغلها تشرح أعمالها .. فيروز وأنغام شرقية طغت على المكان ..الدفا والاحساس أنك في مكان منفصل عن الزحمة اللي برا ..

و حصلنا على  الإعتراف اللي نبيه

( أخيرا نقدر نقول عندنا قسم ديزاين وعندنا أنتيرير ديزاينرز )

فديتكم كلكم أحبكم ..

أخص بالشكر بيش و غدّو و حنّون و إيمي << ولا تزعل

 انهم تعبوا تعب ..

ولا أنسى هدّو و وفا و هنّو .. والديزاينر كلهم ..

عسانا من هالحال و أحلى وأحلى ..

عندما تبوح البعارين

بـاب ما جاء في [ عندما تبوح البعارين ! ]

 

ملاحظة / أأنت المقصود ؟ ..  HELL YES ! .. قبل قراءتك للموضوع اعلم أني قد أطلقت العنان لشياطيني .. يعني لا تدخل وأنت واثق من نفسك أني لا أتحدث عنك !

 

-  1 -

إذا ساورك الملل لحظات ، افتح إحداها [ جريدة ، مجلة ، مدونة ، منتدى ، إيميل ... وبإمكانك إضافة التلفزيون ] .. اقرأ ، تفرج ، واضحك !

أتعجب كيف يمتلك البعض الجرأة لنشر عبارات رصوها أسفل بعض و أسموها [ خاطرة ، نثرا ، قصيدة ...! ]

 

-          2  -

تساؤلات :

• لماذا بين كل 100 [ قصيدة ، نثر ، خاطرة .. ] حب .. نجد 10 فقط منها تتكلم عن موضوع مغاير [ وطن ، أم ، تأمل ، دينية ... ] ؟

• لما يعد الحب القضية الكبرى لدى الكثيرين ؟

• لما أضحت أسماء المنتديات [ تعب قلبي ، غرام ، حبايب ، ... ]

• لما صار الناس يتسمون [ أمير الشوق ، سلطان الغرام ، غزال ملثم ، حلوة ودلوعة ، جريح و مجروح وولهانة !... ]

• لما يتفلسف البعض و يكتب كلام من جنب العارضة [ يعني يسميه خاطرة أو شعر وهو من جنبها ! ] في حين أنه قد لا يعرف عن الحب إلا اسمه !؟

• ليش كل البشر تعاني من الخيانة .. ؟ و ليش ما نلقى من يعترف بأنه خائن مثلا ؟!

• هل تعلم أن بيننا ناس ( منحطة ) .. لها فيسين ( أي وجهين ) .. أو لنقل أنها تظهر بمظهرها هذا لنا حتى تحقق مآرب أخرى !؟

• هل الناس كلها مشاريع حب قائمة !؟ 

 

-   3  -

 

• ( مسوي مثقف و شاعر و رومانسي يا حليله .. ويلقط البنات مثل الفقع .. أو لنقل مثل العلوك – بحكم أنه ما نزل مطر السنة هذي ولا شفنا فقع! – ) !

• قائمة الأصدقاء عنده كلها بنات !

• ( مجروحة تبي من يداويها ) .. وبرضوا .. الأصدقاء كلهم ذكور ( حتى أشمل الشباب و الشيبان ! )

• إذا كتبت له تعليق أو رد تثني على [ قصيدته ، نثره ، خاطرته ، ..... وحتى تصميمه! ] أبقى عليه .. وإن أنت انتقدته و أبديت ملاحظاتك .. حذف أو عدل ما كتبت !!!

• بكل وقاحة يكرر نفس الكلام لكل بنت يعرفها !

• عامله أكشن في حياتها ، حبت ، و انفصلت ، و مات فلان ، و سافرت ، و شالت وحطت ….إلخ ، والعالم متحمسة معاها !

• حياتها مملة و ابتكرت لها عالم آخر على النت تألف فيه قصص عن نفسها !

 

-    4  -

 

أنا لا أسخر من مشاعر وأحاسيس هؤلاء ، لكن مضحك جدا أن يتصنعوها !!

 

-          5 -

لست على علم تام بالبحور والأوزان و عروض الشعر .. لكني أؤمن أنها مسألة بديهيه .. ممكن من قراءتك الأولى للنص تشعر بالخلل فيه أو بالتكلف والتصنع ..

أكثر ما يدفعني للضحك أن أجد كلمات حشيت في النص فقط لأنها على نفس القافية !

 

-          6  –

هذا لا يعني أنه لا يوجد من وهبة الله ملكة ( البوح ) أضاف لها حصيلة لغوية رائعة و أسلوب راقي واضح متمكن بعيد عن التملق و التصنع وحتى الاضطراب.. تتمنى أن لا تنهي ما كتبه !

 

-          7  -

لو قدر لي أن أتولى إدارة تحرير قسم الشعر في جريدة أو مجلة ، أو الإشراف على منتدى يعنى بالشعر .. لآثرت أن أسميه [ عندما تبوح البعارين ] !

كان الله بعون رؤساء تحرير هذه الأقسام .. أتصفحها و أقرأ ” مسخرة ” !

 

-          8  -

أتساءل لمَ علينا دائما أن نرد [ إبداع ، مؤثر ، رائع ، متميز ...] ؟  و إلى متى نستمر في المجاملة ..؟

لا أخفيكم ، وأصارحكم ها هنا .. قد أرد على البعض [ متميز كالعادة ] و بيني وبين نفسي أتساءل what’s the hell ؟!

* و أعاهد نفسي أني لن أجامل بعد اليوم .. وبعطي ( كاش ) *

-          9  –

كأني أشعر ببعضكم تحامل – وربما حقد – عليّ .. لكن يكفيني رد المتنبي :

أرَى المُـتـَـشـَـاعـِـريـنَ غــرُّوا بــذمّـي ××× مــَن ذا يـَـحـــمـدُ الــدَّاء الــعـُـضَـالَ

 

-          10 –

أصبحنا لا نحصي المتشاعرين في المجلس الواحد !

[ سألني : وش أكثر شي معجبك فيني ؟ ××× قلت له: تبي الصدق ؟ ماعندك عند جدتي ! ]

 

-          11 –

على سيرة المتنبي .. غفر الله له في حكم قالها !

على الكثيرين منكم مراجعة كتاباتهم .. و ليقرءوها كأنهم شخص ثالث [ أي ليسوا كتّابها  ] .. و اضحكوا من أنفسكم أعزائي !!

سموني حقودة أو قولوا إن ما عندي سالفة و أتحرش ..

ليغضب من يغضب ، وليرضَ من يرضَ .. لم يعد يهم !!

ـــــــــــــــــــــــــــــــــــــــ

Cutest Ev!l

- مؤسسة منظمة مكافحة اللي ما عندهم سالفة - 

مهرجان الزهور والحدائق الحادي عشر^_^

 

[ تنويه : أكثر من 15 صورة مما قد يبطء ظهور الصفحة ]

تزهو مدينة الجبيل الصناعية هذه الأيام بانطلاق فعاليات مهرجان الزهور والحدائق الحادي عشر يوم الأحد 23 مارس 2008 ،  وتستمر لأسبوعين .

تقام الفعاليات على شاطئ النخيل بمشاركة العديد من المشاتل والمزارع بالإضافة إلى  محلات بيع الحيوانات و كشكات تغليف الهدايا و مطاعم و مراكز التسوق المعروفة في المنطقة ..

تشتمل فعاليات المهرجان على : محاضرات حول العناية بالنباتات و الحدائق ، مسابقة أجمل حديقة منزلية ، مسابقة الفن التشكيلي والتصوير الفوتوغرافي ، المسرح المكشوف للأطفال ، الرياضات والمسابقات المختلفة الممتدة على مدار اليوم ..

الصور تتحدث ..

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

—————–

وعندي أكثر .. بس رحمت النت عندكم !

المهم .. لما يعد أخوي تقريره عن المهرجان بآخذ منه الصور ..

أخيرا

ممكن تعتبرون هذا الموضوع دعوة لزيارة مدينة الجبيل الصناعية و زيارة المهرجان

بس قولوا لي قبلها حتى أوصيهم يفرشون لكم السجادة الحمراء

مهرجان الزهور والحدائق الحادي عشر ^_^

أنا إنسان!

 

..كل ما بي حائر

كل مافيني ثائر ..

وبقلبي سهم غائر ..

جوارحي عقرى

من الألم سكرى

ومن الهم تطوى

طعنه ..

لم تقتلني ..

جعلتني أقوى

لا تبحث عني

لا تسألني ..

عما أهمني ..

هجرت البرى ..

أكتم ألما انبرى ..

خطى على الثرى ..

أردد ..

أنا إنسان ..

ملئه أحزان ..

بهمة البركان ..

وحيد وحوله الخلان ..

روح وكيان

منفصلان

من يعرفنا ؟..

من يضمنا ؟..

وأحلامنا ..

يجمع .. شتاتنا

هو عالم

اللاصفاء

اللانقاء

اللاطهر ..

أيا روح ..

سنلتقي يوما ..

نمضي قدما ..

نشكل حلما ..

ويكفي ألما

يكفي لوما ..

يكفينا صمتا ..

 

 

مع محبتي ..

>>أنا إنسان<<

هذا الأسبوع..

انتهى هذا الأسبوع على خير .. وأنا مرتاحة نفسيا لأن على قائمة الأعمال اللي لازم أنجزها حطيت 9 سمايلي فيس

وباقي لي 4 ..

وعندنا بعد أسبوعين بروجكت دي في الكلية .. والحمد لله خلصت أغلب الشغل اللي لازم أقدمه من الحين ..

طبعا الكم يوم اللي راحوا ماجلست على النت كثير .. بس أشيك على إيميلي .. وتركت شغل المدونات أخلصه على رواق

الهيدر والتدوينات السابقة – أقصد تقاريري المصورة – مدري وش أسوي فيها .. أحط روابطها ولا أتركها ولا أنسخها وأحطها بوست

يبيلي وقت على بال ما أتعود وأتأقلم مع لوحة التحكم هنا و الأشياء هذي .. بيني وبينكم للحين بالغلط أفتح على أكتب

أشكر حبايبي اللي علقوا هنا من أكتب .. ديجي و ريان و هيفاء فديتهم و برضوا اللي استقبلوني هنا يعطيكم العافية

=-=-=-=-=-=-=-=-=

لي عودة ،،

بدأنا ^_^

* صباحكم حلو

لست جديدة على عالم التدوين لكني أدون لأول مره هاهنا .. لا تزال مدونتي قيد ( الترتيب ) .. وستعرفون من خلالها أصدقائي و مدونتي السابقة و مدونين مميزين عرفتهم ..

سأكتب عن كل شيء .. عن الحياة ، السلام ، الحب ، الأصدقاء ، العائلة ، و الدراسة .. سأكون هنا .. موجودة دائما إن شاء الله ..

* علّها تكون بداية تدوين موفقه

دمتم ..