باك .. و صيفنا على لابتوبنا أحلى مع حرنا ..

صورة أثارت (قرحتي) وقررت أن أستفتح بها عودي للتدوين بعد انقطاع .. وبالمرة تزامنا مع زعل مهند ونور وقرار طلاقهم ..

على هالتعبير مع هالتفكير .. أنا أطلق الشباب السعودي بالثلاث ..

أنا محيرني سؤال .. هو وش يعتبر نفسه !؟

أوكي فرضا البنت شفتها في مول و ذبيت عليها كلام و رقمتها ومسايرتك باللي تسويه .. ما تطلع أنت أحقر منها لأنك فكرت وبديت!؟ ولا على راسك طربوش يا باشا !؟ مب عاااقل الأخ يحسب نفسه مهند !!

على فكرة يافرحة أمك يالفاشل .. ترا التدخين يجيب السرطان .. حتى تشبية مثل العالم والناس ماتعرف !؟

 مع ذا الرجل اللي راسمها كأنها من أيام الفراعنة ! 

ليش احنا من بد العالم والناس عندنا هالحركات .. ليش مانعيش بسلام وأمان وبساطة ؟ صعبة ؟

لو أن الولد عن البنت يختلف كان اختلفت حدودهم في الشرع .. خصوصا في الأشياء اللي مايختلف عليها اثنين !

يعني الله ماراح يعاقب البنت اللي ماتصلي ويخلي الولد !؟

عااااد كله كوووم وسالفة ( الدرة المكنونة ) و ( بناتنا مصونات محفوظات ) .. إلخ الاسطوانة .. كوووم ثاني !

اللي يقولون هالكلام .. أصحاب الشنبات اللي يوقف عليها الطير .. غالبا مايكونون هم أول من يهضم حقوق البنت أو الأخت أو الزوجة المسكينة !

طبعا لأجل فرض السيطرة  ،..

شي ثاني ؟!

هل الحب ذنب لازم نحمي البنات منه عشان ( لايخونون أهلهم ) .. وهل هو عذر لولد يتمشى فيه ويتحجج عشان يشيك إذا البنت ( تخون أهلها ) ولا لأ !؟

لا تفهموني مؤيدة ولا حتى معارضة .. أنا حارق رزي أنه شايف نفسه

و على وشو بالضبط  .. ما أدري !؟ هذا وهو معها في الاثم !!

مشكلة دام باقي ناس كذا تفكيرها !!

لو عليهم .. كان مانعرف نقرأ ولا نكتب !!

حتى // كم // .. نستطيع ضمان ] الذاكرة [؟

رسائلي إليهم ..

الرسالة الأولى [ إلى أمي و أبوي ] ،،،

أنتم بعيدين الحين .. تقضون الإجازة بعيد عني الحين.. مشتاقة لكم كثير .. تمنيت يتأجل السفر شوي لأن الوحدة صارت وحدتين..

طول عمري أتباهى بأمي وأبوي.. وطول عمري أسمع أني محظوظة فيهم.. بالأسلوب اللي تتبعونه معي أنا وأخواني ، بأننا نحصل على أشياء غيرنا ما تحصل له .. ثقافة و حريات و اعتماد على النفس،،

أنا فخورة أني دخلت المدرسة و أنا أعرف أكتب وأعرف إنجليزي و أحفظ عشر أجزاء من القرآن .. أني من صغري ولا زلت أفقد الكتاب إذا مر يوم بدون لا أقرأ صفحة ..

أنا فخورة أني حرة أعمل وألبس و أتكلم مثل ما أبي، لأني أعتبر نفسي تأسست على شي صح.. أقيس عليه كل شيء أمارسه الحين و أعرف الصح من الغلط ..

أنا فخورة لأني أعتمد على نفسي بكل شي ومشاكلي أحلها بنفسي و ألجأ لكم إلا إذا استحكمت الحقلة علي ..

بس أحيانا نفس الشي هذا هو اللي يضايقني .. أحيانا ودي أكون مثل باقي البنات اللي أهلها يوجهون لها كل حياتها ! عشان أرتاح من نفسي ومن الأفكار اللي تجي براسي .. أرتاح أني ما أعرف أنا نجحت أو فشلت !

أمي .. خاطري أكلمك الحين و أبكي .. ولا ما ببكي عشان لا أخرب وناستك ..والله شكلي ببكي و بقولك ترجعين الحين الحين ! بقولك غرفتي للحين حوسة ولا فيه أمل أرتبها .. بقولك أن الأكل اللي أسويه فعلا غير صالح للاستهلاك البشري .. بقولك إن ماعندي شي أسويه إلا الدواره في البيت .. بقولك أني اليوم شفت فيلمين و 5 حلقات مسجلة من نور بس لأني فاضيه !

باقي ثلاث أسابيع.. وألحقكم إن شاء الله ..

سلمي على أبوي و بوسي لي عبد الرحمن ..

الرسالة الثانية [ إلى أخوي / محمد ] ،،،

يوم عن يوم أشك أنك توأمي ! .. يمكن لأننا احنا الوحيدين القراب في العمر من بعض !؟ سنة بس .. بيني وبينك ..

خيّووو .. الحنيّن .. اللي إذا شافني أبكي يبكي معي ولا يرد لي طلب .. عاد ليتك تشوفني الحين !!

يوم عن يوم أشوف فيك الأديب المرهف الحس ..

يوم عن يوم تسمع صوتك للنجوم .. ولا تردك سقوف المجتمع !

صحتك يوم عن يوم تتدهور وأنت مو مهتم ! و بديت أحاتي هالشي لأني أحبك ! مثل هالأمور ما فيها لعب !

اهتم بصحتك بليز يعافيك ربي ! .. مو عشاني .. بس عشان تسوي كل الأشياء اللي تبي تسويها !

الرسالة الثالثة [ إلى جدتي ،، ]

قلبي ينبض الحين ،، بفضل دعواتك لي ..

الله يديمك على راسي ..

الرسالة الرابعة [ إلى نهى ]

سبع سنوات يا نهى .. ست ساعات في اليوم.. وجهي في وجهك !

تتركيني في زمن الانهيارات !!؟

يرحم أيام ما نعرف من عوار الراس إلا مرحلة علقنا فيها في final fantasy ولا شخصية ما اكتشفناها في tekken !! .. أيام يصحونك من النوم بس عشان أقولك أني ختمت لعبة أو عرفت كلمة السر !

 تتركيني الحين يا نهى !؟

أعتبر نفسي أكثر وحدة أعرف وضعكم في البيت كيف صاير ، والشي هذا يحسسني أني أنانية لما أقول لا تتركيني , أنا قاعدة أصعب الموضوع عليك ..

نهى بروحتك بكون فقدت ذاكرتي .. بضطر أبدأ كل شي من أول وجديد .. من الصفر .. حتى تكويناتي الدماغية !!

نهى الإنسانة اللي تقولين عنها ملاك .. اللي تعتبرينها قائدة متنازلة عن القيادة .. اللي تجلس ساندة ظهرها للباب و سماعات الـmp3 في أذنها تنتظرك الصبح ,, إنسانة أنتي سبب من أسباب تماسكها الحين .. من بعدك بتنهار دولتها .. بينتهي مفعول سلطتها !! نهى .. أحبك ..

الرسالة الخامسة [ إلى ناديه ]

ليش كل هالخوف والحوسة !!؟

هذا وصار لك سنتين من ملكتك !! وكم مرة تأجل زواجكم فيها ..

هذا الإنسان اللي اخترتيه و حبيتيه .. وكنتي تتمنينه دايم !

المسج اللي رسلتيه البارح بكاني ,, وأنا لحالي في البيت !

توصلين بالسلامة لبيت زوجك .. بس لا تتغيرين علي .. فاقدتك من الحين كثير .. ومشتاقتلك كثير..  ودامك في أولها .. ترا فيه بنات المفروض نعزيهم إذا تزوجوا .. وفيه بنات نهنيهم .. اختاري ؟ .. وابني حياتك الجاية مثل ما تبين ..

الله يسخره لك ..  و آسفة لأني أخذت موقف من الزواج .. البلاك هووول اللي تبلع الناس اللي أخذت مني كل اليل أحبهم .. ما بيطاوعني قلبي أحضر !

لا تقطعيني من أخبارك .. بليز ..

الرسالة السادسة [ إلى شخص سألني مره ؛ إذا قطعنا الرأس كيف يرجع ؟ ]

خسرتك ؟!!

خسرتني ؟!!

انتهينا على كذا !!؟

ما أدري !! .. بس أنا عند قسمي ووعدي بكتاب منك ، فيك ، لك ، وعشانك ..

الرسالة السابعة [ لي .. أنا ] ..

الرسالة بتكون لي .. بس ما أعرف وش المفروض أكتب فيها !!؟

في قسمي .. مافيه توازن في الشغل .. ممكن نجلس شهر فاضيين .. وفي أسبوع يطلع لنا شغل السنة كلها ..

آخر شهر من الدراسة كنا شبه فاضيين لا شغلة ولا عمله .. اللهم البنات اللي ناقصهم شي يكملونه .. فجأه لما صار باقي أسبوع على الفاينلز قالت لنا مس قريشيا أننا قبل لانسلم الشغل ( تصميم الشقة ) .. فيه  أشياء إضافية لازم نسويها !!

طبعا NO WAY! لأن الأشياء اللي تبيها مو معقولة على الأقل يبيلها وقت وأسبوع مايكفي !! .. غير كذا قالت أن الفاينل راح يكون عبارة عن برزنتيشن شرح عن الشغل هذا كله .. البنات مروا بظروف ضغط الله العااالم فيها و إلى آخر ساعة قبل الفاينل وأنا أشتغل على تصميمي ! ..

أما تقديم البرزنتيشن فكان عبارة عن أن كل بنت تدخل لحالها مع مس قريشيا و مس فيللي و دكتورة نضال - بس دكتور نضال ماحضرت كل البنات - و تشرح لها الشغل بأي طريقة كانت و تجاوب على أسئلتهم ,,

طولوا .. والبنات قدام الاستديو ينتظرون أدوارهم .. إلى أن صارت الساعة 2 و نص الظهر و جاء دوري وباقي كم بنت بعدي.. جت مس قريشا قالت خلاص .. يوم السبت .. عصبنا و أصرينا .. نبي نخلص الحين قالت أجل كل بنت عشر دقايق تشرع على السريع .. قلنا أوكي .. أهم شي ننجز !!

دخلت و قدي نسيت كل شي ! أول شي من الصبح وأنا أنتظر بعدين عصبت .. حسيت نفسي مخي فاااضي .. بس الحمد لله جبت علامة حلوة ..

الصيفية جت ! << قولي والله ! >> واللخبطة في النوم واليوم بدأت !! .. و على الشهرين اللي راحوا كنت أمر بظروف نفسية سيئة - حواليكم ولا عليكم - .. خس وزني 4 كيلو .. ماطلعت لا رحت ولا جيت لأن بكل بساطة ما أصحى إلا الساعة 8 أو 9 بالليل .. وعلى ما أبدأ يومي وأصحصح وين تلقى مكان فاتح !

أهلي بيسافرون ..شكلهم بيخلوني هنا أنا وأخوي .. ما بيطولون .. لأن فيه زواجات لازم نحضرها ..

مريت في فترة أشوف فيلمين و ثلاثة في اليوم << ضياع وقت!! >> وربي ما صار لي أسبوع شفت 20 موفي تقريبا !

she’s all that

almost normal

baby mama

because i said so

just friends

night at the museum

وغيرها كثير .. ،،

وصرت أتابع نور ..  مع أني ما أحب نوعية المسلسلات هذي .. مو ناااقصة صياح بعد .. بس بدأت أتابع حتى إعاداته !

مممممممممممم وبعد ؟

أيوااا .. نزل قرار رسمي بمنعي من دخول المطبخ - بعد ماتفلسفت وسويت لأهلي عشا - لأن الأكل اللي أسويه غير صالح للإستهلاك الآدمي !

قرأت كم رواية على كم كتاب وشي خلصته وشي ماخلصته ..

والحين عاااطل باااطل والصدر ضايق و المزاج معكر والصحة على القد وكل شي ..

على ناصر القصبي ( الله يخارجنا !! )

يوم بعد آخر .. أفقدهم ..

أناس .. لا أدري أأخطأت بجعلهم نواة حياتي وأيامي كلها ؟

منهم .. من كان شمسا لمجرتي كلها .. وبقايا عطر حول عنقي ..

منهم .. نصف ذاكرتي .. لا حاجة لي بقلبي معهم لأنهم هم .. قلبي النابض!

 منهم .. أخوة وأكثر! .. أصدقاء وأكثر! .. يومي أنا ..وأكثر !

هنا .. بدونكم .. أصارع الوحدة و الحنين  !!

السلام عليكم .. عدنا والعود أحمد !

أفيدكم علما بأني ولله الحمد والمنه طلعت من الشر مثل الغزال ..

 آخر اختبار كان الإثنين .. ممممممممم صحيح كنت تعبانه مره و رشح مع غبرة هاليومين و صداع وأشياء أخرى ..

بس محد بيوقف متعة اليوم الأخير ..

برتاااح كم يوم وبرجع على قلوبكم .. عندي أشياء كثيرة تقرقع بقلبي ..

وكل الحب لحبيبتي ديجافو والصريح ريان و القمر هيفاء

وحشتوني والله !

مَايو يحتضر ..

مَايو الذي أنهَكتني لعَنَاتهُ.. منهكٌ الآن

مَايو الذي نِلتُ من سِيَاطِهِ مَا يَكفِي..

يُودعُ الآن ..

هيّا مَايو .. هيّا ..

إنها اللّيلة الأخِيرة ..

اجعِلها هُدنة ..

ودعنا نَرقد بسَلام..

الليلة الأخيرة..يا مَايو

والكَثرة تغلبُ الشجاعة ..

مَايو يحتضر .. وكلانا بحاجة للراحة ..

مَايو.. أتاني بإحدى وعشرينَ سنةً

وحزنَ عام ..

مَايو.. وخنجراً غجرياً باتَ ليالِيكَ تحتَ وسادتِي

مَايو وما غَفَى جفنِي على الحُدود

مَايو وحِصار..  وتضييقُ خنِاق..

وأضيق ..

وأضيق ..

الليلة مَايو..

الليلة..

لنفعَلهَا ..

ولنستَرِيح ..

by: Cutest Evil

صباحكم / مساؤكم .. بسمة ..

 الموضوع هذا من الأسبوع اللي راح وأنا أبي أرسله بس صارت ظروف كثيرة منعتني على رأسها الخبر الصدمة بهديل الحضيف - الله يرحمها ويغفر لها و يعين أهلها - ….

الموضوع عن احتفال مع البنات بمناسبة ذكرى ميلادي أنا و سومي حبيبتي

( Kawaii Girl )

طبعا بيني وبين سومي أربع أيام .. وكلنا صرنا عجايز .. وكل شيء مشروح الحين لأننا كملنا الـ21 ..

وكنت أقولهم من قبلها بأسبوع .. لاتفكرون تحتفلون عشاني لأن مافي خاطري أعد هالسنة من عمري ..خصوصا أني ودعتها بأشياء مو حلوة ..

الترتيب كان على نونا

(Meaw Cat )

و كانت أحلى لمة مع بقية الشلة و زميلات الأقسام - الديزاينرز والأم آي إس - وطفينا شموع و استانسنا و ضحكنا وأكلنا

طبعا المفروض أنه مفاجأه لي أنا بالذت

بس عرفت وخربت عليهم ..

قبل أبدأ الصور والسواليف .. أحب أقول أن عندي أغلى صديقات بالدنيا

ومن جد ما أدري وش بسوي بدونكم ..

نونا يمكن تودعنا و تكمل برا .. ولا أدري وين أروح ولا شلون بقدر أمشي في الجامعة وهي مو فيها

وسومي عسى الله لا يخليني منها .. نشبه بعض .. نفس الأشياء تصير لنا في نفس الوقت

Miko ..

اللي حضرت آخر الحفلة لأن كان عندها محاضرة متأخرة ..

تعرف هالآدمية اشلون تفرح قلبي ..

كلكم قريبات مني ..

وإذا على إحساسي بالوحشة والغربة اللي بهدلي الأيام اللي راحت

أحبكم وربي أحبكم ..

ممممممممممم نبدأ نستعرض الصور ..

أحلى وحدة تضبط كب كيك في الدنيااا مييييييييييييين ..؟

أكييييييييد سومي لبى قلبها ..

لو تلاحظون أن في كل مناسبة نطلب منها تسوي كب كيك ..

في حفلاتنا اللي قبل و في رحلتنا لسايتك .. تسلم ايدينك سومي ..

فدييييييييييت اللي حضروا واستهبلوا ..

غبت ذاك اليوم ولا حضرت ولا محاضرة ..

و الكيك والشموع .. طفيناها سوااا أنا وسومي ..

 

أنتم ملاحظين أنهم أول ما أكلوا.. أكلوا اسمي ..!!

اللي يجي أول يصور أول

وه بس !

وهذي هدية ميكو فديتها ..

بقية الهدايا .. ما مداني أصورها و أنسقها .. بس صورت هذي بعدين..

بطاقة من نونا - الهدية كانت شنطة طقمت هي زيها -.. كاتبة فيها كلام .. وحاطه قصيدة صيحتني ..

I see the clouds rolling in and oh how it looks like rain
And it is always I fight for the welcome change
When it rains it pours on this heart of mine
So, I take the storms I feel to her each time.But I know she has lived under her own pouring rain
Yet under her water her heart still doesn’t change
She can walk away from what hangs overhead
And, not in her storm, are words left unsaid.

Not in her storm have I ever felt alone
Her storm ends, so I, may find my way home
It’s for me that she pushes away her own rain
So, that I may find comfort in calling her name.

She lives in this world for the sake of another’s heart
God, how she eases the miles when worlds apart
And she never wanders when your world falls through
Not ever in her storm would she do this to you.

She has wings that I know not only I can see
Cause only an angel could find strength to carry me
It’s the way that the eyes can surely view
How her heart’s written so clearly in what an angel can do.

Not in her storm is her work ever done
And even in her storm she hands me the sun
When her world is dark - I always have light
And now how I hold the new color of night.

She takes then she gives to an unhappy face
So that many can find an awesome place
I have been able to love her more every day
And with her hand in mine the clouds roll away.

Not in any storm that I will ever live beneath
Could ever change what I hold here inside of me
Not in any of her storms have I lost my angels touch
To that angel out there, I love her so much.

آآآآآآآآآآآآآآآ نونا أحبك ..

عساني ما أنحرم منكم يا رب .. وعساكم دوم معي ..

باب ما جاء في

 [ بين الحب ، الرومانسية ، والجنس .. ]

ما دفعني للكتابة سؤال سألني إياه أحدهم ، ومقطع بلوتوث شاهدته هذا اليوم عن واحد مصور حبيبته .. << وحطوا تحتها 15 خط!

لست بمؤهلة للحديث عن كيمياء الحب مثلا أو عن سيكولوجيا الجنس أو ماهية الرومانسية ..

لكني أستطيع القول ومن فهمي للأمور أن الحب يكمن في القلب .. والرومانسية فكر و منظار .. أما الجنس فـ شغله فيزيائية – حيوية ..

ليس كل رومانسي محب ولكن كل محب رومانسي ..

الرومانسية الفكر لا تقتضي الحب تظهر في النظرة الشاعرية والعاطفية للكل شيء .. الرومانسيين عاشقو الجمال .. أما الحب فيقتضي الرومانسية وأظن الحب غني عن التعريف ..

كلاً من الحب والرومانسية قد يقتضيان الجنس بطريقة أو بأخرى .. وقد يأخذ منحنى أصدق من الصدق نفسه فيدفعك للتعفف  .. لكن الجنس لا يقتضي الحب ولا الرومانسية ..

لا يجوز في أي حال من الأحوال المزج بين الثلاثة معا واعتبارها أمرا واحدا .. بس هذا الحاصل ..!!

كانوا سابقا إذا قيل للرجل : ( ابنك أحب فلانة ) يقول ( الحمد لله الذي صيره لطبع الآدمي ! ) ..

والحين من كثر ماتسمع حب حب حب ولّد ايحاء لدى الشباب والبنات أن كل شي ممكن يفسر على انه حب … دام إن شعار ماكدونالدز ( أنا أحبه ) .. كل شي جاااايز ! كنتيجة للإفراط في الحب .. صار الحب مضر بالصحة وما يصير وعيب و فشيله !

بغض النظر عن المناااظر العجيبة اللي شفتها في المقطع ، الأكيد أن الصوت والكلام كان يعطيك انطباع بشيء والمقطع ككل شيء نقيض تماما .. << شكل البلوتوث بيمسك الخط مع موضوعي ..

المهم .. افتح نت أو مجلة أو أي وسيلة تواصل و شوف  جوع الحب وش مسوي بالناس !

الفكرة أن الحب صار مدخل لأغراض أخرى دنيئة .. في حين قل الرومانسيون  يمثلهم الآن الرسامون والشعراء .. وممكن الناس كلها .. إلااااا المغنيين !! بالتالي قل الناس اللي يستشعرون الجمال ويقدرون يفسرونه ويشبهونه.. وبما ان كل شي دخل في بعضه .. صار كل من قال ( أحبك ) روماااانسي .. !! ما أدري إذا سمعتوا في مقوله ( كل عاشق شاعر وليس كل شاعر عاشق ) .. والمقولة صحيحة 100% .. من وجهة نظري على الأقل !

لم يبحث الناس عن الحب ؟ ولم نربط بين الحب الحقيقي والجنس ؟ ولم أصبح لون الرومانسية أحمر ؟!

ابن القيم – رحمة الله – ألف كتابا قبل قرون من الزمان اسمه ( الجواب الكافي لمن سأل عن الدواء الشافي ) المعروف باسم ( الداء والدواء ) .. تحدث فيه عن الحب وأنواع الحب و الشذوذ في الحب و هل الحب مرض ؟ …  يقول ابن القيم ( والحب أصل كل حركة في الكون ، لأن الحركة نوعان حركة طبيعية نتيجة محبة وحركة قسرية ) من بحثي في هذا الموضوع ومن قراءتي المتواضعة لكتب التاريخ ما مر علي من عابه الحب أو انتقصه لا قاضي ولا قائد ولا حتى نبي !.. وبلييييز خلوا مجنون ليلى على جنب .. الله لايبلانا ! ..

فــصــل [ مسائل في الحب والبلوتوث ! ]

لمقطع البلوتوث اللي عفسني وفقع قلبي تعساً له ولمصوره .. فيه مسائل ..

الأولى : الحب كوسيلة بالنسبة لشاب..

الثانية : الحب كغاية بالنسبة للبنت ..

الثالثة : التصوير و التشهير

والرابعة : الله أعلم بها .. كل مايمكن أن يحدث بعد ذلك ..

أما في تفسيري – غفر الله لي ولوالدي – فتفسرها نظريتي التي لا أملُّ من ترديدها واللي استنبطتها من روايات أغاثا كريستي !

( العفن الذي يبدأ من الداخل ) .. الفاكهة تتعفن من الداخل .. وبعد فترة يظهر العفن على سطحها .. !!

راح تسألون عن سبب هذا العفن واش ولده .. أظن مافيه قاعدة أو فكرة معينه ممكن أقول انها سبب هالعفن .. لكن جايز تكون ، مرض نفسي ، تفريغ انفعالي ، تفجير المكبوتات ، الممنوع مرغوب ، تنكيل وربما انتقام ، استعراض عضلات أو ذكاء… كل شي ممكن ..

أضيفوا إلى ذلك أننا في فترة انفتاح .. شباب كانوا خامدين ونايمين طول الفترة اللي راحت .. فجأه صحوا ولقوا الدنيا تغيرت أغاني وأفلام وناس منحطة شغالة ليل نهار ما تمل ، بنات مبهورين بالانفتاح نفسه وصدقوا انه ممكن يجي يوم مانفرق فيه بين بنت أمريكية وسعودية .. مع العلم انهم هم اللي يبغوا يصيروا مثلنا ولاااا تقولوا تضحكين على نفسك .. أنا أتكلم من نماذج شفتها حولي   .. اش ممكن تكون ردة الفعل .. ؟!

أما في معنى الثانية – رحمني الله – فأصلها القول دوما بأن البنت أكثر عاطفية وقدرة على إعطاء الحب أكثر من أي كائن آخر وقلبهاااا بينفجر وييين تودي الحب هذا كله .. ؟! .. وآمنت انه أحد أهدافها في الحياة لازم تحب بالطيب بالغصب مو مهم .. أنا عندي حب .. ولازم أعطيه !!

عندي صديقة أفتخر بصداقتها .. انفصل أبوها وأمها وعمرها 3 سنوات .. وتزوج أبوها وتزوجت أمها وكلا عاش في حال سبيله بينما بقيت هي مشتته مع أخ وأخت يكبرانها عاشوا في بيت منفصل لا عند الأب ولا عند الأم.. لم تتعذر بالحنان الذي فقدته لتبرر بحثها عن من يجمعها  .. حتى أنها لم تبحث عن الحب في غير داخلها وفي المعاني الجميلة حولها .. اعتمدت على نفسها وأصبحنا نحيطها دوما و لا نتوقف عن القول لها بأننا نحبها .. هي اليوم تعمل ممرضة أطفال .. أفتخر بحبي لصديقتي هذه لأنها جسدت قوة الشخصية و غيرت في بعض الأفكار والمفاهيم ..

أما ما جاء في الثالثة فأحسن الأقوال قول الله عز وجل ( إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون …. )

يقول رسول الله صلى الله عليه وسلم : ( كل أمتي مغفور لهم بإذن الله إلا المجاهرون . قيل : ومن المجاهرون يا رسول الله ؟ قال : أن يبيت الرجل ليلته في معصية وقد ستره الله ، فإذا أصبح قال لصاحبه : البارحة فعلت كذا و كذا ) فيكشف سر نفسه متبجحا بمعصيته !

ولا أزيد عليه ..

رؤيتي لكل هذا التلوث وهذا الخلط يشعرني بالأسى حقا ! .. ويعز علي كثير انحطاط الكثير خلف شر متنكر بزي حب ..

في ربط الحب الحقيقي بالجنس .. لايجيني أحد مطفي اللمبات ويقول طيب والحب بين الرجل وزوجته يعني مو حب حقيقي ؟! ..

أقول – والله تعالى أعلم – حبهم حقيقي أو غير حقيقي شيء و الجنس شيء ثاني لأن أصلا أصلا أصلا هذا الهدف من الزواج .. ونسمع عن أزواج مايحبون بعضهم ولا يكرهون بعضهم .. مجرد تعود وعادة وأداء واجب و خلاص ! وفيه أزواج أساس مشاكلهم الجنس و فيه أزواج عايشين بتبات ونبات بدون مايخلفوا عيال وبنات لظروف أحد الزوجين كأن يكون عاجزا أو مقعدا أو مشلول أو غيره ..

وأعود لسؤالي عن الرومانسية وعلاقتها باللون الأحمر .. الواقع أني لم أجد تفسيرا .. ربما لأن الثلاثة أصبحوا في هذا الزمن كتلة واحده ممكن أقول أن الرومانسية ارتبطت باللون الأحمر المرتبط بالشهوانية عن طريق الحرفين الأخيرين (يــة ) فظن الناس أنهما مسممين لمسمى واحد ! حتى أن الغزل صار غزلا فاحشا نخجل من سماعه..

فــصــل [ كتمان الحب ] ..

لما سئل ابن عباس رضي الله عنه في تفسير قوله تعالى ( وأما من خاف مقام ربه ونهى النفس عن الهوى * فإن الجنة في المأوى )

قال : ( من عشق وعفَّ و كتم وصبر غفر الله له وأدخله الجنة ) ..

يقول المتنبي غفر الله له :

كتمت حبك حتى منك تكرمة ××× ثم استوى فيه إسراري وإعلاني

علّ الكتمان أحد خصائص الحب .. أن تحتفظ به في داخلك .. وترعاه .. لا معنى لحب يحاصرك به الناس في كل قول وفعل .. فيعيرونك أو يكيدوا لك أو يحسدوك أو يذموا أو يحمدوا..

فــصــل [ قلب وقلوب ] ..

من يهوى قلبه التنقل فيهيم بكل جمال فهو رومانسي وليس عاشق .. والحب الحقيقي يأتي مره .. لست مضطرا لتحريه لأنه سيجد طريقه إليك أينما كنت و على أي حال أنت .. عليك فقط أن تعرف كيف تربيه وترعاه .. ولا تتعذر بكرامة أو كبرياء .. فلا كبرياء ولا كرامة في الحب .. إنما حدود تحيطنا ونصونها ليبقى الحب آمنا في مكانه طاهرا وصادقا في تعابيره لا يختلط بمسميات أخرى و دنايا أخرى ..

فــصـــل [ قــ ـ ـ ـلبـ ـ ـي ! ]

لو قُدر لي أن أقع في الحب يوما .. يا رب .. أريده حبا قادما من أول التاريخ .. حيث قلبك مملوء بالحب ولا شيء غير الحب فيلوثه .. أريد حبا أزليا كما لم يحب بشر قبلي .. حبا يعطيني كرامة خاصة .. يضفي مسحة من مروءة ورفعة .. ولا يلغيه بعد أو قرب .. ويملأ قلبي دفء .. 

دمتم .. بـ ـ ـ ـحب ..

صباحكم / مساءكم حُب ..

 أخبار اللي واحشيني فديتهم .. ؟

صار لي فترة عن التقارير .. واليوم معي تقرير عن البروجكت دي في جامعتنا ..

طبعا اللي دروا دروا واللي ما دروا يدرون أنهم غيروا اسمها من كلية الجبيل الجامعية إلى جامعة الهيئة الملكية ، بالإضافة إلى أنهم اعترفوا فيها دوليا الأسبوع اللي راح ..

غير كذا .. الأسبوع الجاي إجازة بمناسبة زيارة أنكل جورج بوش للمنطقة الشرقية .. فيه ناس كذبوا الخبر يقولون ما فيه إجازة .. الله أعلم .. بس في الجريدة يقولون السبت راح يتأكد 

المهم من ثلاث أسابيع واحنا نجهز ونعد العدة للبروجكت دي و نقص ونحوس و هات يا قماش و إضاءة و أسلاك .. بروجكتنا كان غاليري ..

أنوااااع الوناسة لأن تخصصنا غير .. الأم آي إس و السي إس و البزنس كلهم تقريبا نفس الكارير في النهاية .. الأم آي إس 1 سووا كوفي شوب و الأم آي إس 2 سووا سكيري هاوس - اسمحوا لي أنا سميته تكفيخ هاوس !! لأنهم يضربون مو يخوفون !  - و البزنس و السي إي كلهم عارضين لابتوبات و سيديات و اكسسوارات .. إلا أحنا فديتنا .. غاليري .. كانت أجواء الإفتتاح غير على أنغام فيروز ,, ما أستعجل .. خلونا نشوف مراحل العمل ..

قص البراويز ..  

لازم بريك .. لازم دومينوز

بس يا أننا سوينا مقلب غير مقصود في مسنا الهندية ..

هي هندوسية و حرام عندهم ياكلون لحم .. وطبعا البيتزا لازم فيها لحم .. قمنا حطينا لها قطعتين وحده لحم والثانية باباروني ..عاد هي رجعت اللحم قالت ما آكله وأخذت الباباروني تحسبه طماط .. يوم أكلته جتنا تسأل قالت وشو هذا ؟

قلنا باباروني .. قالت يعني من وشو ؟

قلنا لحم ..

عاد لو تشوفون وجهها وشلون انصفق ..

لووووووووووول البنات أنواااع التعليقات ..

ياااويلك يا مس أكلتي إلهك .. ههههههههههه وقعدت تنقش في البيتزا وشالت كل شي عليها و أكلتها كذا .. !!

هذي قرطاسيتنا .. كل مايحتاجه الديزاينر وفرته لنا الهيئة الملكية الله يعزها .. وهي سر حسد الأقسام الثانية لنا   

مكتبي وحوستي ..

الخطوة الثانية .. يرتبون لنا الكافيريا .. ويقلعون كل الكراسي والطاولات بعيد ويحطون لنا البارتشنز ..

ونبدأ نثبت القماش على البارتشنز .. جلسنا إلى الساعة 8 ونص واحنا نقص و ندبس  .. وصلنا لمرحلة تحشيش مستعصية .. وصار الاستيعاب بطيء !!

بعد تركيب الاضاءة السبوت لايت و تثبيت الأعمال .. طبعا كل بنت مع مجموعة من شغلها ..

و هذي فازات حطينا فيها شموع وصارت حركة حلوة .. .. طبعا هذا كورنري و كورنر غدّو

فديتها مس قريشيا ..

بالمره مريت من عند مستودع الفتنس ولقيته مفتوح و أخذت له هالصورة .. 

آآآآآآآآآآآآآآآآ باسكن روبنز كااان هناااا .. 

هذا الكوفي شوب حق الأم آي إس 1 .. خطييييييييير ..

وهذا تخريع هاوس - يقولون أن كلية التربية سوت زيه قبل !! ..

الكومبيوتر ساينس .. مافهمت الحوسة هذي بالضبط لأيش .. أظنهم كانوا يعرضون شيء عن الجافا وكذا ..

البزنس ما أدري وشو مشروعهم بالضبط بس عجبتني حركة الشاشة اللي يتكلم فيها بيل غيتس … 

صابون صناعة مختبر الكمستري ..

قصته قصة ..

من أول سمستر درست فيه كمستري و أخذنا الصابون .. جبت معي زيت عطر وأعطيته لمس ندى فديتها قلت نبي نحطه مع الصابون عشان تصير ريحته حلوه ..

بس قدنا سوينا التجربة وخلاص .. قالت بعدين ..

والسمستر اللي بعده خلصت وصار عندي كمستري 2 .. شافتني في الممر قالت تراني باقي متذكرة أني وعدتك بصابون بزيت العطر اللي تحبينه

قلت لها أصلا نسيت الموضوع ,,

والسمستر الثالث .. في البروجكت دي .. مرتني في الغاليري قالت فوفو تعالي بوريك شي .. وورتني صابون مسويته بالعطر اللي جبته ..

لميتها و شكرتها انها باقي متذكرة و شلت الصابون معي

الفتنس سووا عيادة يقيسون وزن وطول وضغط ومدري وشو..  

هذا ما أدري تبع مين بالضبط .. ماشاء الله كلهم جايبين مكاتب و مرتزين عليها ..  

برضوا السي إس ..مدري البزنس.. والله لاتلوموني .. كلهم يتشابهون ..

و أنتهى اليوم و شلنا قشنا ..

كان تعب مرررررره

أهني كل الديزاينر اللي كانت نتيجة شغلنا باينه في ردود أفعال كل من يدخل الغاليري ..

 وأولهم مس نورة ودكتور نضال لما قصوا شريط الافتتاح ..

كل بنت وقفت عند شغلها تشرح أعمالها .. فيروز وأنغام شرقية طغت على المكان ..الدفا والاحساس أنك في مكان منفصل عن الزحمة اللي برا ..

و حصلنا على  الإعتراف اللي نبيه

( أخيرا نقدر نقول عندنا قسم ديزاين وعندنا أنتيرير ديزاينرز )

فديتكم كلكم أحبكم ..

أخص بالشكر بيش و غدّو و حنّون و إيمي << ولا تزعل

 انهم تعبوا تعب ..

ولا أنسى هدّو و وفا و هنّو .. والديزاينر كلهم ..

عسانا من هالحال و أحلى وأحلى ..