رسائلي إليهم ..
الرسالة الأولى [ إلى أمي و أبوي ] ،،،
أنتم بعيدين الحين .. تقضون الإجازة بعيد عني الحين.. مشتاقة لكم كثير .. تمنيت يتأجل السفر شوي لأن الوحدة صارت وحدتين..
طول عمري أتباهى بأمي وأبوي.. وطول عمري أسمع أني محظوظة فيهم.. بالأسلوب اللي تتبعونه معي أنا وأخواني ، بأننا نحصل على أشياء غيرنا ما تحصل له .. ثقافة و حريات و اعتماد على النفس،،
أنا فخورة أني دخلت المدرسة و أنا أعرف أكتب وأعرف إنجليزي و أحفظ عشر أجزاء من القرآن .. أني من صغري ولا زلت أفقد الكتاب إذا مر يوم بدون لا أقرأ صفحة ..
أنا فخورة أني حرة أعمل وألبس و أتكلم مثل ما أبي، لأني أعتبر نفسي تأسست على شي صح.. أقيس عليه كل شيء أمارسه الحين و أعرف الصح من الغلط ..
أنا فخورة لأني أعتمد على نفسي بكل شي ومشاكلي أحلها بنفسي و ألجأ لكم إلا إذا استحكمت الحقلة علي ..
بس أحيانا نفس الشي هذا هو اللي يضايقني .. أحيانا ودي أكون مثل باقي البنات اللي أهلها يوجهون لها كل حياتها ! عشان أرتاح من نفسي ومن الأفكار اللي تجي براسي .. أرتاح أني ما أعرف أنا نجحت أو فشلت !
أمي .. خاطري أكلمك الحين و أبكي .. ولا ما ببكي عشان لا أخرب وناستك ..والله شكلي ببكي و بقولك ترجعين الحين الحين ! بقولك غرفتي للحين حوسة ولا فيه أمل أرتبها .. بقولك أن الأكل اللي أسويه فعلا غير صالح للاستهلاك البشري .. بقولك إن ماعندي شي أسويه إلا الدواره في البيت .. بقولك أني اليوم شفت فيلمين و 5 حلقات مسجلة من نور بس لأني فاضيه !
باقي ثلاث أسابيع.. وألحقكم إن شاء الله ..
سلمي على أبوي و بوسي لي عبد الرحمن ..
الرسالة الثانية [ إلى أخوي / محمد ] ،،،
يوم عن يوم أشك أنك توأمي ! .. يمكن لأننا احنا الوحيدين القراب في العمر من بعض !؟ سنة بس .. بيني وبينك ..
خيّووو .. الحنيّن .. اللي إذا شافني أبكي يبكي معي ولا يرد لي طلب .. عاد ليتك تشوفني الحين !!
يوم عن يوم أشوف فيك الأديب المرهف الحس ..
يوم عن يوم تسمع صوتك للنجوم .. ولا تردك سقوف المجتمع !
صحتك يوم عن يوم تتدهور وأنت مو مهتم ! و بديت أحاتي هالشي لأني أحبك ! مثل هالأمور ما فيها لعب !
اهتم بصحتك بليز يعافيك ربي ! .. مو عشاني .. بس عشان تسوي كل الأشياء اللي تبي تسويها !
الرسالة الثالثة [ إلى جدتي ،، ]
قلبي ينبض الحين ،، بفضل دعواتك لي ..
الله يديمك على راسي ..
الرسالة الرابعة [ إلى نهى ]
سبع سنوات يا نهى .. ست ساعات في اليوم.. وجهي في وجهك !
تتركيني في زمن الانهيارات !!؟
يرحم أيام ما نعرف من عوار الراس إلا مرحلة علقنا فيها في final fantasy ولا شخصية ما اكتشفناها في tekken !! .. أيام يصحونك من النوم بس عشان أقولك أني ختمت لعبة أو عرفت كلمة السر !
تتركيني الحين يا نهى !؟
أعتبر نفسي أكثر وحدة أعرف وضعكم في البيت كيف صاير ، والشي هذا يحسسني أني أنانية لما أقول لا تتركيني , أنا قاعدة أصعب الموضوع عليك ..
نهى بروحتك بكون فقدت ذاكرتي .. بضطر أبدأ كل شي من أول وجديد .. من الصفر .. حتى تكويناتي الدماغية !!
نهى الإنسانة اللي تقولين عنها ملاك .. اللي تعتبرينها قائدة متنازلة عن القيادة .. اللي تجلس ساندة ظهرها للباب و سماعات الـmp3 في أذنها تنتظرك الصبح ,, إنسانة أنتي سبب من أسباب تماسكها الحين .. من بعدك بتنهار دولتها .. بينتهي مفعول سلطتها !! نهى .. أحبك ..
الرسالة الخامسة [ إلى ناديه ]
ليش كل هالخوف والحوسة !!؟
هذا وصار لك سنتين من ملكتك !! وكم مرة تأجل زواجكم فيها ..
هذا الإنسان اللي اخترتيه و حبيتيه .. وكنتي تتمنينه دايم !
المسج اللي رسلتيه البارح بكاني ,, وأنا لحالي في البيت !
توصلين بالسلامة لبيت زوجك .. بس لا تتغيرين علي .. فاقدتك من الحين كثير .. ومشتاقتلك كثير.. ودامك في أولها .. ترا فيه بنات المفروض نعزيهم إذا تزوجوا .. وفيه بنات نهنيهم .. اختاري ؟ .. وابني حياتك الجاية مثل ما تبين ..
الله يسخره لك .. و آسفة لأني أخذت موقف من الزواج .. البلاك هووول اللي تبلع الناس اللي أخذت مني كل اليل أحبهم .. ما بيطاوعني قلبي أحضر !
لا تقطعيني من أخبارك .. بليز ..
الرسالة السادسة [ إلى شخص سألني مره ؛ إذا قطعنا الرأس كيف يرجع ؟ ]
خسرتك ؟!!
خسرتني ؟!!
انتهينا على كذا !!؟
ما أدري !! .. بس أنا عند قسمي ووعدي بكتاب منك ، فيك ، لك ، وعشانك ..
الرسالة السابعة [ لي .. أنا ] ..
الرسالة بتكون لي .. بس ما أعرف وش المفروض أكتب فيها !!؟
