حبتك القرادة!

باك .. و صيفنا على لابتوبنا أحلى مع حرنا ..

 

صورة أثارت (قرحتي) وقررت أن أستفتح بها عودي للتدوين بعد انقطاع .. وبالمرة تزامنا مع زعل مهند ونور وقرار طلاقهم ..

على هالتعبير مع هالتفكير .. أنا أطلق الشباب السعودي بالثلاث ..

أنا محيرني سؤال .. هو وش يعتبر نفسه !؟

أوكي فرضا البنت شفتها في مول و ذبيت عليها كلام و رقمتها ومسايرتك باللي تسويه .. ما تطلع أنت أحقر منها لأنك فكرت وبديت!؟ ولا على راسك طربوش يا باشا !؟ مب عاااقل الأخ يحسب نفسه مهند !!

على فكرة يافرحة أمك يالفاشل .. ترا التدخين يجيب السرطان .. حتى تشبية مثل العالم والناس ماتعرف !؟

 مع ذا الرجل اللي راسمها كأنها من أيام الفراعنة ! 

ليش احنا من بد العالم والناس عندنا هالحركات .. ليش مانعيش بسلام وأمان وبساطة ؟ صعبة ؟

لو أن الولد عن البنت يختلف كان اختلفت حدودهم في الشرع .. خصوصا في الأشياء اللي مايختلف عليها اثنين !

يعني الله ماراح يعاقب البنت اللي ماتصلي ويخلي الولد !؟

عااااد كله كوووم وسالفة ( الدرة المكنونة ) و ( بناتنا مصونات محفوظات ) .. إلخ الاسطوانة .. كوووم ثاني !

اللي يقولون هالكلام .. أصحاب الشنبات اللي يوقف عليها الطير .. غالبا مايكونون هم أول من يهضم حقوق البنت أو الأخت أو الزوجة المسكينة !

طبعا لأجل فرض السيطرة  ،..

شي ثاني ؟!

هل الحب ذنب لازم نحمي البنات منه عشان ( لايخونون أهلهم ) .. وهل هو عذر لولد يتمشى فيه ويتحجج عشان يشيك إذا البنت ( تخون أهلها ) ولا لأ !؟

لا تفهموني مؤيدة ولا حتى معارضة .. أنا حارق رزي أنه شايف نفسه

و على وشو بالضبط  .. ما أدري !؟ هذا وهو معها في الاثم !!

مشكلة دام باقي ناس كذا تفكيرها !!

لو عليهم .. كان مانعرف نقرأ ولا نكتب !!